Ko tō mātau kitenga anamata ko te tiketike Tūhoetanga 
Our vision of our future is Tūhoe Prosperity 

Matapono
Our Beliefs

1. Ko te ako, ko te mahi rangatira 
 Teaching and learning are the most honourable professions 

2. Aku uri tau manawa ukiuki 
 Our history like our future is with our children and their children 

3. Mō te hinengaro te ngākau ka kite, 
 mā te ngākau te hinengaro ka mārama 
 The mind gives the heart sight, 
 The heart gives the mind vision 

4. Ko te tauira te tino kauhau 
By example is the most potent lesson 

5. Katoa tātau tātau katoa 
Together we triumph  ō
 

Pumanawa
Our Virtues

1. He hōnore he korōria ki te Atua, he maungārongo ki te whenua, he whakaaro pai ki ngā tāngata katoa 
 Spiritual truth, harmony with the earth, goodwill to all mankind 

2. Ko maru noho iti tōku nui 
 Power with humility is our strength 

3. Mai i te ngākau koi hotahota te whakataenga koronga 
 From our passions, come our greatest achievements 

4. Te pono o te aroha ko te whaitika 
 The most honest expression of love is justice 

5. Ko au rā te kākano o te taunuke o te hue o tēnā tangata ō Tūhoe 
 I am the seed of the stem from the harvest that is the man Tūhoe 

Nga Uara
Our Values 

1. Matemateāone 
 Rapture for life 

2. Rangatiratanga 
 Completeness 

3. Pukuaroha 
 Clement 

4. Ūpoko Pakaru 
 Unyielding 

5. Mana Motuhake 
 Self Determination 
 

Kupu Whakatau
Our School Constitution

Ko te Wharekura o Rūātoki he tūrangawaewae he Marae kāinga nō Ngāi Tūhoe. 

Kua aua atu i te kotahi rau ngā tau e noho ana tēnei kura hei papa ahuru whakatipu tangata rangatira, hei wharekaha puri tūmanako ā, hei pō rekareka whakahoa tangata tuitui whanaungatanga. 

He Kura Kaupapa Māori tēnei ki te rohe ō Rūātoki puta atu hoki i āna pūtanga.  Ko te manawa o te kura nei ko te Tūhoetanga, ko tērā e whakāria ana e ngā marae tuangahuru o te whārua, e ōna hapū, e ōna whānau, rātau te taituara o te Wharekura. 

Ko te Pōari o te Wharekura tō rātau kaimahi, he arataki he ungaunga i ngā ākonga ki ngā tiketike whakataenga e huarahi atu ana i tō rātau Tūhoetanga.  Kei te pukapuka mahere rautaki ngā whakamārama o te mahi tahi ō te iwi, ō ngā Kaimahi o te Wharekura, ō ngā ākonga me te Pōari hoki e hei ai ngā whakataukī. 

Tangata Whenua

I tēnei wā 145 ngā ākonga mai i te tau tuatahi ki te tau tekau mā toru, 87 ō rātau ka kitea ki te Kura Tuatahi me ō rātau kai whakaako 8 ka puta 35 ngā ākonga kei te Kura Tuarua 7  ngā Kaiwhakaako.  Hui katoa 23 ngā Kaimahi kei te kura. 

He wairua pai e tau ana i waenga i ngā ākonga Kaiwhakaako, Kaimahi, te Pōari me ngā Matua o ngā Tamariki.  Tera anō hoki ki ngā momo roopū tuku ratonga whakahāere kaupapa ā iwi. 

Ngā Whare

E tū pai ana ngā whare o te Kura me ōna papa.  Kei te pūmau te kura ki te whakatutuki i ngā mahi whakatikatika whakapai e noho tōtika tonu ai ki te kaupapa mātauranga ko te Wharehui te wāhi kitea ai ngā mahi e pā ana ki te katoa ō Rūātoki, Tūhoe hoki i tua atu o ngā papa tākaro. 
 

Marautanga

Kei te kaha te Kura ki te whaiwhakaaro ki ngā kaupapa pae tata ā te Kāwanatanga arā: 
1. Kia whaitaenga te katoa 
2. Kia noho haumaru ki te ako 
3. Kia pai ake te mahi pānui tuhi tatau 
4. Kia koi ake te whakamahi i te pūtea tātai kōrero mō ngā taenga ākonga 
5. Kia pai ake te hua mō ngā ākonga taka ki te raru 
6. Kia pai ake te hua mā ngā ākonga Māori 
7. Kia hoatuna he āwhina ara mahi ki ngā ākonga atu i te tau 7 
8. Kia koi te tuku pūrongo 

Kua uru ngā whāinga mātauranga ā motu me ngā whāinga pae tata ā motu ki ngā whakahāere ā Kura ā te Pōari hoki, e kitea ai i roto i ngā mahi mahere.  Kua tinana te ako pānui tuhi tātai ki te hunga takamuri i ngā tau 1 ki te 10.  Āta tātaritia ai ngā taenga ā ia tau kia mōhiotia ai ngā ākonga hei āwhina hei turuki.  Kia uru atu hoki te kaupapa whai ara mahi ki ngā akomanga tau 1 ki te 6 pērā anō hoki i te tau 7 ki te 10 i roto i a rātau ako hāpori ki ngā tai pakeke.  Kua tatū te arotake me te whakatikatika i te hangana me te whakahāere o ngā  whai tohu whiwhinga NCEA e kitea ai he pūāwaitanga nui e te kura me ngā ākonga. 

Ka mahi tahi te Pōari me ngā Kaiwhakaako ki te whakapakari i te Tūhoetanga puta noa i te Kura.  E hoki mai ai te peha e kii ra ‘Kāre atu he Kura i Rūātoki mō ngā akoranga kaupapa Māori’.